Khwab main roshni روشنی dykhny ki tabeer

حضرت ابن سیرین رحمتہ اللہ علیہ نے فرمایا ہے کہ خواب میں روشنائی دین کی ہدایت پر دلیل ہے۔ اور اگر دیکھے کہ اس نے روشنی لی ہے یا کسی نے اس کو دی ہے تو دلیل ہے کہ کسی کو دین کا علم سکھائے گا اور سیدھا راستہ بتائے گا اور خواب میں اندھیرا گمراہی اور بددینی ہے۔ فرمان حق تعالیٰ ہے: {اَللّٰہُ وَلِیُّ الَّذِیْنَ اٰمَنُوْا یُخْرِجُہُمْ مِّنَ الظُّلُمٰتِ اِلَی النُّوْرِ} (البقرہ ۲:۲۵۷) ’’اللہ ایمان والوں کا مالک ہے کہ ان کو تاریکی سے نور کی طرف نکالتا ہے۔‘‘ حضرت ابراہیم کرمانی رحمتہ اللہ علیہ نے فرمایا ہے۔ اگر دیکھے کہ اس کے سینے میں روشنی پڑی ہے۔ دلیل ہے کہ پارسا اور دیندار ہو گا۔ فرمان حق تعالیٰ ہے: { اَفَمَنْ شَرَحَ اللّٰہُ صَدْرَہٗ لِلْاِِسْلَامِ فَہُوَ عَلٰی نُوْرٍ مِّنْ رَّبِّہٖ} (الزمر۳۹:۲۲) ’’کیا وہ شخص کہ جس کا سینہ اللہ تعالیٰ نے اسلام کے لیے کھول دیا ہے تو وہ اپنے رب کی طرف سے نور پر ہے۔‘‘ اور اگر خواب میں دیکھے اس کے اردگرد روشنائی ہے تو یہ اس کی خیر و عافیت پر دلیل ہے۔ حضرت جعفر صادق رحمتہ اللہ علیہ نے فرمایا ہے کہ خواب میں روشنی کا دیکھنا چار وجہ پر ہے: اول: دین کی ہدایت۔ دوم: علم۔ سوم: سیدھا راستہ۔ چہارم: پاک عقیدہ۔