Khwab main jihad karna غزا کردن (جہاد کرنا) dykhny ki tabeer

حضرت ابن سیرین رحمتہ اللہ علیہ نے فرمایا ہے کہ اگر خواب میں دیکھے کہ راہ خدا میں جہاد کرتا ہے تو دلیل ہے کہ اس کا اور اس کے خویشوں کا کام نیک ہو گا اور سب بے نیاز ہو جائیں گے۔ فرمان حق تعالیٰ ہے: {وَ مَنْ یُّہَاجِرْ فِیْ سَبِیْلِ اللّٰہِ یَجِدْ فِی الْاَرْضِ مُرٰغَمًا کَثِیْرًا وَّسَعَۃً } (النساء۴:۱۰۰)’’اور جو شخص راہ خدا میں ہجرت کرے گا تو زمین پر بہت سا منافع اور کشائش پائے گا۔‘‘ اور اگر دیکھے کہ اس نے جہاد سے منہ موڑا ہے تو دلیل ہے کہ اپنوں سے منہ کو پھیر لے گا۔ فرمان حق تعالیٰ ہے : {ہَلْ عَسَیْتُمْ اِِنْ تَوَلَّیْتُمْ اَنْ تُفْسِدُوْا فِی الْاَرْضِ وَتُقَطِّعُوْا اَرْحَامَکُمْ} (محمد۴۷:۲۲) ’’کیا قریب ہے کہ تم منہ پھیرو اور زمین میں فساد کرو اور قطع رحمی کرو۔‘‘ حضرت ابراہیم کرمانی رحمتہ اللہ علیہ نے فرمایا ہے کہ اگر دیکھے کہ جہاد پر گیا ہے تو دلیل ہے کہ دولت اور نعمت اور بزرگی پائے گا۔ فرمان حق تعالیٰ ہے: {فَضَّلَ اللّٰہُ الْمُجٰہِدِیْنَ عَلَی الْقٰعِدِیْنَ اَجْرًا عَظِیْمًا} (النساء۴:۹۵) ’’اور اللہ نے جہاد کرنے والوں کو بیٹھنے والوں پر اجر عظیم عطا فرمایا ہے۔‘‘ اور اگر دیکھے کہ اس ملک کے لوگ جہاد کے لیے باہر نکلے ہیں تو دلیل ہے کہ عزت اور مرتبہ پائے گا اور لوگوں کو مغلوب کرے گا۔ حضرت جابر مغربی رحمتہ اللہ علیہ نے فرمایا ہے کہ اگر دیکھے کہ کافروں کے ساتھ تنہا جنگ کرتا ہے تو دلیل ہے کہ دشمنوں پر فتح پائے گا اور اس کو روزی حلال ملے گی اور عمر دراز ہو گی۔ فرمان حق تعالیٰ ہے: {وَلَا تَحْسَبَنَّ الَّذِیْنَ قُتِلُوْا فِیْ سَبِیْلِ اللّٰہِ اَمْوَاتًا بَلْ اَحْیَآئٌ عِنْدَ رَبِّہِمْ یُرْزَقُوْنَ فَرِحِیْنَ بِمَآ ٰاتٰہُمُ اللّٰہُ مِنْ فَضْلِہٖ} (آل عمران ۳:۱۶۹تا ۱۷۰) ’’اور جو لوگ اللہ تعالیٰ کی راہ میں قتل کئے گئے ہیں ان کو مردہ گمان نہ کرو بلکہ وہ اپنے رب کے نزدیک زندہ ہیں، رزق دیئے جاتے ہیں۔ جو کچھ اللہ نے ان کو اپنے فضل سے دیا ہے اس پر خوش ہیں۔‘‘ حضرت جعفر صادق رحمتہ اللہ علیہ نے فرمایا ہے کہ خواب میں جہاد کرنا چھ وجہ پر ہے : (۱) خیروبرکت (۲) آنحضرت صلی اللہ علیہ وسلم کی سنت ادا کرنا (۳) دشمن پر فتح پانا (۴) بیماری سے شفاء (۵) بادشاہ کی اطاعت (۶) غنیمت پانا۔