Khwab main honṭ لب ہا (لب، ہونٹ) dykhny ki tabeer

حضرت ابن سیرین رحمتہ اللہ علیہ نے فرمایا ہے کہ خواب میں لبوں کا دیکھنا مرادوں کے پورا ہونے پر دلیل ہے اور نیچے کا لب اوپر کے لب سے بہتر ہے اور بعض اہل تعبیر نے بیان کیا ہے کہ لب خواب میں خویش اور قریبی رشتے دار ہیں۔ اگر دیکھے کہ اوپر کا لب اپنی جگہ سے زائل ہوا ہے تو دلیل ہے کہ اس کا مال زوال میں ہو گا اور نیچے کے لب کی بھی یہی تاویل ہے اور اگر دیکھے کہ کسی نے اس کا نیچے کا لب کاٹا ہے تو دلیل ہے کہ عورت کو طلاق دے گا یا عورت اس کو ہلاک کرے گی اور اگر دونوں لب گرے ہوئے دیکھے تو دلیل ہے کہ اس کو ماں باپ کی طرف سے مصیبت پہنچے گی اور یہ بھی کہتے ہیں کہ چغل خور ہو گا اور اگر اپنے لبوں کو درد مند دیکھے تو دلیل ہے کہ غمگین ہو گا اور اگر دیکھے کہ اس کے لب آپس میں چسپیدہ ہیں اس طرح کہ کھل نہیں سکتے ہیں تو دلیل ہے کہ اس کا کام رکے گا اور اگر عورت اپنے لب پر سیاہ خال یعنی تل دیکھے تو دلیل ہے کہ اس کی عزت زیادہ ہو گی۔ حضرت جابر مغربی رحمتہ اللہ علیہ نے فرمایا ہے کہ اگر دیکھے کہ اپنا لب دانتوں میں پکڑ کر زخمی کیا ہے تو دلیل ہے کہ اس کا جھگڑا ہو گا جس سے ہلاکت کا خوف ہے اور اگر دیکھے کہ اس کے لب سوجے ہوئے ہیں تو دلیل ہے کہ اس کا مال زیادہ ہو گا اور اگر دیکھے کہ اس کے لب سرخ ہیں تو دلیل ہے کہ حاکم بنے گا اور اگر دیکھے کہ اس کے لب سبز یا سفید ہیں تو دلیل ہے کہ دوستوں کی وجہ سے غم کھائے گا اور اگر دیکھے کہ اس کے لب کمزور اور ضعیف ہیں تو دلیل ہے کہ اس کا حال بد ہو گا۔ حضرت جعفر صادق رحمتہ اللہ علیہ نے فرمایا ہے کہ خواب میں اوپر کا لب لڑکوں اور نیچے کا لب لڑکیوں پر دلیل ہے۔