Khwab main bistar بستر dykhny ki tabeer

حضرت ابن سیرین رحمتہ اللہ علیہ نے فرمایا ہے کہ بستر خواب میں دیکھنا عورت ہے اور اس کی نیکی اور بدی کا تعلق عورت سے ہے اور اگر خواب میں دیکھے کہ بستر کو بستر سے بدلا ہے یا ایک بستر سے دوسرے بستر پر گیا ہے تو دلیل ہے کہ دوسری عورت کرے گا اور پہلی کو طلاق دے گا اور اگر دیکھے کہ بستر کی حالت بدل گئی ہے تو دلیل ہے کہ اس کی عورت کی حالت بدلے گی اور اگر دیکھے کہ اس کا بستر دوسرے کا بستر ہو گیا ہے اور دوسرے کا اس کا ہو گیا ہے تو اس سے بہتر یا خراب تو دلیل ہے کہ دوسری عورت کرے گا اور پہلی کو طلاق دے گا اور اگر دیکھے کہ اپنا بستر بیچا یا لپیٹ لیا ہے تو دلیل ہے کہ عورت کو طلاق دے گا یا غائب ہو گی یا ان دو میں سے ایک مرے گا۔ حضرت ابراہیم کرمانی رحمتہ اللہ علیہ نے فرمایا ہے کہ اگر کوئی اپنے آپ کو نامعلوم بستر پر دیکھے تو دلیل ہے کہ اسی قدر و قیمت پر اس کو نقصان پہنچے گا اور اگر دیکھے کہ اس کا بستر نامعلوم چارپائی پر بچھا ہے اور وہ اس پر بیٹھا ہے تو دلیل ہے کہ بزرگی اور نفع پائے گا اور دشمن کو مغلوب کرے گا۔ حضرت جابر مغربی رحمتہ اللہ علیہ نے فرمایا ہے کہ بستر خواب میں ولایت اور تن آسانی ہے۔ فرمان حق تعالیٰ ہے: {مُتَّکِئِینَ عَلٰی فُرُشٍ بَطَائِنُہَا مِنْ اِِسْتَبْرَقٍ} (الرحمن ۵۵:۵۴) ’’فرشوں پر تکیہ لگانے والے جن کے اندر ریشم ہے۔‘‘ اور اگر خواب میں دیکھے کہ بستر کو گھر سے باہر ڈالا ہے اور پھر گھر میں لایا ہے تو دلیل ہے کہ وہ اپنی عورت کو طلاق رجعی دے گا۔ اور اگر اپنے آپ کو تین بستر یا چار بستر پر لیٹا ہوا دیکھے تو دلیل ہے کہ بستروں کے شمار پر عورتیں کرے گا یا کنیزیں خریدے گا۔ اور اگر اپنے بستر کو گھر میں دیکھے یا گڑھے میں دیکھے کہ جہاں سے اسے باہر نہیں نکال سکتا ہے۔ اس سے دلیل ہے کہ اس کی عورت بیمار ہو گی اور اس کے رنج سے خلاصی نہ پائے گا۔ اور اگر اپنے آپ کو نرم بستر پر سویا ہوا دیکھے تو دلیل ہے کہ وہ سال اس پر مبارک ہو گا اور اگر دیکھے کہ اس کا بستر پشم سے بھرا ہوا ہے تو اس سے اس امر کی دلیل ہے کہ وہ کوئی مالدار عورت کرے گا۔ اور اگر دیکھے کہ اس کا بستر پھٹ گیا ہے یا جل گیا ہے تو دلیل ہے کہ اس کی موت اب قریب آ گئی ہے اور اس کے عیال کو دین و دیانت اور شرم نہ ہو گی۔ اور اگر دیکھے کہ اس کا ریشم کا بستر سوتی بستر سے بدل گیا ہے تو دلیل ہے کہ بدکار عورت کو دور کر کے نیک عورت کرے گا۔ اور اگر خواب میں دیکھے کہ اس کے بستر کو چوہے نے سوراخ کر دیا ہے تو دلیل ہے کہ اس کی عورت کا کسی کے ساتھ نالائق معاملہ پڑے گا اور وہ خرابی پر راضی ہو جائے گا۔ اور اگر اس کا بستر ہوا میں معلق ہے تو دلیل ہے کہ اس کا بستر بلند جگہ پر بچھایا جائے گا اور اس کا شغل بالا ہو گا اور دولت پائے گا۔ اور اگر دیکھے کہ اس کا بستر ہوا سے زمین پر گرا ہے تو دلیل ہے کہ اس کی عورت بیمار ہو گی اور آخر کار شفاء پائے گی۔ حضرت دانیال رحمتہ اللہ علیہ نے فرمایا ہے کہ اگر بستر سبز دیکھے تو دلیل ہے کہ دیندار اور پارسا عورت کرے گا اور اگر خواب میں اپنا بستر سرخ دیکھے تو اس امر کی دلیل ہے کہ اس کی عورت بدخو اور ناموافق ہو گی۔ اور اگر دیکھے کہ اس کا بستر پرانا تھا اور نیا ہو گیا تو دلیل ہے کہ اس کی عورت کا بدخلق نیک خلق ہو جائے گا اور اگر دیکھے کہ نیا بستر پرانا ہو گیا ہے تو اس سے یہ دلیل ہے کہ اس کی عورت نیک خلق سے بدخلق ہو جائے گی۔ اور اگر دیکھے کہ اس کا بستر سبز سے سرخ ہو گیا ہے تو دلیل ہے کہ اس کی عورت اصلاح سے فساد کی طرف مائل ہو گی اور اگر اس کے خلاف ہے تو فساد سے اصلاح کی طرف آئے گی۔ اور اگر دیکھے کہ اس کا بستر سرخ سے سفید یا زرد ہو گیا تو دلیل ہے کہ اس کی عورت گناہ سے توبہ کرے گی اور بیمار ہو گی چنانچہ موت کاخوف ہوگا۔ اور اگر دیکھے کہ اپنا بستر بچھا کر سرہانا رکھا ہوا ہے تو اس امر کی دلیل ہے کہ وہ عورت کرے گا یا خادم اور کنیزیں خریدے گا اور اگر اپنے بستر پر سرہانے لگے ہوئے دیکھے تو خادموں پر دلیل ہے۔ فرمان حق تعالیٰ ہے: {وَنَمَارِقُ مَصْفُوْفَۃٌ}’’اور قالین قطار در قطار لگائے ہوئے۔‘‘ اور اگر نامعلوم جگہ پر بستر دیکھے تو دلیل ہے کہ زمین خریدے گا اور ہل چلائے گا اور اہل تعبیر بیان کرتے ہیں کہ وراثت پائے گا۔ اور اگر دیکھے کہ بستر پر سویا ہوا ہے تو دلیل ہے کہ راحت اور سہولت پائے گا اور اگر دیکھے کہ ہوا پر بستر بچھا کر سویا ہوا ہے تو دلیل ہے کہ عورت کی وجہ سے مرتبہ اور بزرگی پائے گا اور اگر دیکھے کہ اس کا بستر پھٹا ہوا ہے تو دلیل ہے کہ اس کی عورت نابکار ہو گی۔ اہل تعبیر بیان کرتے ہیں کہ اس کی عورت مرے گی۔ اور اگر دیکھے کہ آگ لگ گئی ہے اور وہ جل گیا ہے تو اس سے یہ دلیل ہے کہ عورت کو طلاق دے گا یا مرے گی۔ حضرت جعفر صادق رحمتہ اللہ علیہ نے فرمایا ہے کہ خواب میں بستر کو دیکھنا چار وجہ پر ہے: اول: عورت۔ دوم: کنیزک لونڈی۔ سوم: ولایت۔ چہارم: معیشت اور منفعت اور تن آسانی۔