Khwab main angooṭhi انگشتری (انگوٹھی) dykhny ki tabeer

حضرت دانیال رحمتہ اللہ علیہ نے فرمایا ہے کہ اگر کوئی شخص خواب میں انگوٹھی کی صفت اور نقش دیکھے تو دلیل ہے کہ اس کو اس کے آقا سے خیر اور نیکی پہنچے گی اور اگر دیکھے کہ اس کو کسی نے انگوٹھی مہر کرنے کے لیے دی ہے تو دلیل ہے کہ جو کچھ اس کے لائق ہے، بہت پائے گا یعنی انگوٹھی کی قدر و قیمت کے مطابق‘ اگر بادشاہی کے لائق ہے تو بادشاہ ہو گا ورنہ مال و دولت پائے گا اور اگر دیکھے کہ مسجد میں یا نماز میں یا جہاد میں کسی نے اس کو انگوٹھی دی ہے تو دلیل ہے کہ وہ شخص عابد اور زاہد ہو گا۔ اگر سوداگر ہے تو تجارت میں نفع پائے گا۔ علی ھذا القیاس اور اگر دیکھے کہ اس کو بادشاہ نے انگوٹھی دی ہے تو دلیل ہے کہ اس کو ملک میں سے بادشاہ کچھ دے گا یا بادشاہ کے ملک میں اس کو یا اس کے خویشوں کو برائی پہنچے گی۔ حضرت ابن سیرین رحمتہ اللہ علیہ نے فرمایا کہ اگر خواب میں دیکھے کہ اس کی انگوٹھی ضائع ہوئی یا کوئی چیز چرا کر لے گیا ہے تو دلیل ہے کہ اس کے کاموں میں آفت یا دشواری ظاہر ہو گی اور اگر دیکھے کہ انگوٹھی ٹوٹی اور اس کا نگینہ رہا تو دلیل ہے کہ اس کی بزرگی بہتر ہو گی اور اس کی آبرو اور وقار قائم رہے گا اور اگر دیکھے کہ اس نے اپنی انگوٹھی کسی کو بخشی ہے تو دلیل ہے کہ اپنی ملک میں سے جو کچھ مال و دولت رکھتا ہے اس میں سے کچھ کسی کو بخشے گا اور اگر دیکھے کہ اپنی انگوٹھی فروخت کی اور اس کی قیمت لی ہے تو دلیل ہے کہ جو کچھ اس کے پاس ہے فروخت کرے گا اور اگر قیمت نہیں لی ہے تو جائیداد کا کچھ حصہ فروخت کرے گا۔ حضرت کرمانی رحمتہ اللہ علیہ نے فرمایا ہے کہ اگر خواب میں دیکھا ہے کہ اس کی انگوٹھی کی ساخت ناپسندیدہ ہے تو دلیل ہے کہ اس کے مال کو کچھ ہو گا اور بادشاہ اس پر غصہ کرے گا اور اگر چاندی کی انگوٹھی دیکھے تو دلیل ہے کہ اس کا مال حلال کا ہے اور اگر سونے کی انگوٹھی دیکھے تو دلیل ہے کہ اس کا مال مکر وہ اور حرام ہے اور اگر آہن یعنی لوہے کی انگوٹھی دیکھے تو دلیل ہے کہ اس کا مال مکروہ اور حرام ہے اور اگر آہن کی انگوٹھی دیکھے تو جو کچھ اس کے پاس ہے تھوڑا اور ذلیل ہے اور اگر انگوٹھی سات دھات یا سفید قلعی کی دیکھی تو مال کے تھوڑا ہونے کی دلیل ہے اور اگر خواب میں دیکھے کہ اس کی انگوٹھی دیو لے گیا ہے تو اس خواب کی تعبیر سب سے بری ہے۔ حضرت جابر مغربی رحمتہ اللہ علیہ نے فرمایا ہے کہ اگر کوئی شخص خواب میں دیکھے کہ اس کی انگوٹھی لوہے کی ہے تو دلیل ہے کہ قوت اور توانائی پائے گا اور اگر تانبے یا رانگ کی ہے تو دلیل ہے کہ بے اصل لوگوں سے فائدہ اٹھائے گا۔اور اگر بلور کی انگوٹھی دیکھے تو دلیل ہے کہ عام لوگوں سے اس کو کچھ ملے گا اور اگر چاندی کی انگوٹھی دیکھے تو اس کو کہیں سے کچھ ملے گا اور اگر دیکھے کہ اس نے اپنی انگوٹھی کسی کے پاس امانت رکھی ہے یا بخش دی ہے اور اس نے بھی اس کو انگوٹھی واپس دی ہے تو دلیل ہے کہ نکاح کے لیے عورت چاہے گا اور قبول نہ کرے گا اور نہ ہی اس کو دیں گے اور اگر دیکھے کہ اس نے اپنی انگوٹھی توڑی ہے تو دلیل ہے کہ اس کے عیال میں جدائی پڑے گی۔ اور اگر دیکھے کہ اس کی انگوٹھی کے دو نگینے ہیں تو اگر اس کو کسی نے دی ہے اور دونوں نگ ایک دوسرے کے مطابق ہیں تو اس امر کی دلیل ہے کہ صاحب خواب غلام زادہ ہے۔ اور اگر دیکھے کہ ان دونگوں میں سے ایک گر گیا ہے تو اس امر کی دلیل ہے کہ دو گناہوں میں سے ایک سے توبہ کی ہے۔ اور اگر دیکھے کہ لکھے ہوئے خط پر اپنی انگوٹھی سے مہر لگائی ہے تو دلیل ہے کہ کوئی پوشیدہ چیز اس کو ملے گی اور اگر دیکھے کہ کھلے خط پر مہر لگائی ہے تو یہ بھی اس امر کی دلیل ہے کہ کوئی پوشیدہ چیز اس کو اس کو ملے گی۔ حضرت جعفر صادق رحمتہ اللہ علیہ نے فرمایا ہے کہ خواب میں چاندی کی انگوٹھی کو دیکھنا چار وجہ پر ہے۔ اول: سلطنت۔ دوم: عورت۔ سوم: فرزند۔ چہارم: مال و دولت اور سونے کی انگشتری نیک ہے اور اگر عورت دیکھے کہ انگوٹھی نگ سمیت ضائع ہو گئی ہے تو اس امر کی دلیل ہے کہ اس کا مرتبہ اور عزت گرے گی یا اس کا بچہ مرے گا یا مال ضائع ہو گا اور اگر حاکم ہے تو معزول ہو گا۔ اگر عورت ایسا خواب دیکھے تو اس کا خاوند یا فرزند مرے گا۔